Tuesday, January 1, 2008

എന്റെ ഗീതാഞ്ജലി... നിനക്കായ്‌

1

നീ എനിക്ക് ശബ്ദമാണ്‌

അകലങ്ങളില്‍ നിന്നും ഒഴുകി എത്തുന്നു;

ശംഖിനുള്ളിലെ കടലിരമ്പം പോലെ..

കാതോര്‍ത്തിരുന്നാല്‍ അതു കേള്‍ക്കാം

ഇരുട്ടിലെ കാലന്‍ കോഴിയുടെ കരച്ചില്‍

അവഗണിച്ച് ഞാന്‍ കാതോര്‍ത്തിരിക്കുന്നു ...
2
നീ ആഴക്കടലാണ്

ശാന്തത തോന്നിപ്പിക്കുന്ന പരപ്പ്

വിഷസര്‍പ്പങ്ങളും ചുഴികളും

ഒളിപ്പിക്കുന്ന കണ്കെട്ടുകാരന്‍

അതില്‍ ഞാന്‍ തേടുന്ന മുത്തുകളും

നീലയുടെ അഗാധത

നിന്നിലേക്കു നോക്കുമ്പോള്

ഞാന്‍ മൊഴിയറ്റവളാകുന്നു...

3

ഈ തണുത്തിരുണ്ട രാത്രികളിലെ

കമ്പിളിപ്പുതപ്പാണു നീ

ഇമകള്‍ക്കിടയിലെ നീര്‍മുത്തു നീ

നീ ഒരു ചിരാതിന്റെ വെളിച്ചം

നീ ഒരു ധ്രുവനക്ഷത്രം

ഞാന്‍ നിന്നെ

കണ്മഷിയായി കണ്ണിലണിയുന്നു...

4

നീ അരുതുകളുടെ കൂമ്പാരം

ഞാന്‍ നിന്നിലേക്കു ചേക്കേറിയത്‌

വജ്രങ്ങളെ മോഹിച്ച്‌ ...

പക്ഷേ ഈ കന‌ല്‍കട്ട

എന്റെ കൈ പൊള്ളിച്ചുവല്ലൊ...

ഒറ്റപെടുത്തുന്ന കുറ്റബോധം

കൈയുടെ നീറ്റല്‍‍,

പിന്നെ നെഞ്ചിലേക്കും പടരുന്നു.

ഒന്നു പുലരാന്‍ ഞാന്‍ കാത്തിരിക്കുന്നു

5

നീയെന്ന വീഞ്ഞു കുടിച്ചു

ഞാന്‍ കവിതകളുടെ

ദിനരാത്രങ്ങള്‍ ആഘോഷിക്കുന്നു.

മുപ്പത് വെള്ളിക്കാശിനു

നീ എന്നെ പണയപ്പെടുത്തുമെന്നറിയാം:

എന്നാലും എന്റെ മത്തു പിടിച്ച

രാത്രികള്‍ക്ക് കൂട്ടിരിക്കാന്‍ നീ മാത്രം;

ഞാന്‍ ഉന്മാദലഹരിയില്‍ പൊട്ടിച്ചിരിക്കുന്നു .

നിന്റെ പുഞ്ചിരിയില്‍

പ്രണയത്തിന്റെ വേലിയേറ്റം

നിന്റെ പരിഭവത്തില്‍

കണ്ണീരിന്റെ വേലിയിറക്കം

ഞാന്‍ നിന്നെ കവിതകളില്‍ ആഘോഷിക്കുന്നു

6

നീ എനിക്കൊരു മരുപ്പച്ചയാണ്

ഈ കയ്പു കുടിച്ചു മടുക്കുമ്പോള്‍

മുമ്പിലെത്തുന്ന ജീവാമൃതം.

നീ അടുക്കുംതോറും അകലുന്ന പ്രഹേളിക

ജീവിക്കാന്‍ കാരണം തിരയുന്ന

എനിക്ക് നീ ഒരു തിളങ്ങുന്ന നക്ഷത്രം.

ഞാന്‍ നിറഞ്ഞ ശൂന്യത.

എന്റെ സ്നേഹമെല്ലാം

നീ കയ്ക്കലാക്കി കഴിഞ്ഞിരിക്കുന്നു ...

7

നീ അരുതുകളുടെ മണിമുഴക്കം

നീ മധുരിക്കുന്ന പ്രിയ സ്വപ്നം

നീ ഓര്‍മകളിലെ നനവ്‌

നീ സ്വപ്നങളുടെ കുപ്പിവളക്കൂട്.

മഞ്ഞളിക്കുന്ന സത്യത്തില്‍

നിന്റെ കറുത്ത മുഖം

എന്നിട്ടും ഞാന്‍ നിന്നെ സ്നേഹിക്കുന്നു

ഹൃദയച്ചിമിഴില്‍ ഒളിപ്പിക്കുന്നു ....

10 Comments:

At January 1, 2008 at 8:37 PM , Blogger കണ്ണൂരാന്‍ - KANNURAN said...

സ്വാഗതം ബൂലോഗത്തേക്ക്...

കയ്ക്കലാക്കി - കൈക്കലാക്കി...

 
At January 1, 2008 at 9:43 PM , Blogger ശ്രീ said...

പുതുവര്‍ഷത്തിലെ തുടക്കം നന്നായി.
സ്വാഗതം!
:)

 
At January 2, 2008 at 12:37 AM , Blogger Sanal Kumar Sasidharan said...

ആരോ !
കവിത വളരെ നന്ന്.

 
At January 2, 2008 at 12:45 AM , Blogger ഗുപ്തന്‍ said...

അനാമിക.. സ്വാഗതം. കൂടുതല്‍ രചനകള്‍ പ്രതീക്ഷിക്കുന്നു.

 
At January 2, 2008 at 8:16 PM , Blogger Seema said...

വായിച്ച് അഭിപ്രായം പറഞ്ഞവര്‍ക്കൊക്കെ നന്ദി.കവിത ഇഷ്ടപ്പെട്ടുവെന്നു അറിഞ്ഞതില്‍ സന്തോഷം.

 
At January 3, 2008 at 8:44 AM , Blogger ഏ.ആര്‍. നജീം said...

നല്ല തുടക്കം.... :)
ബൂലോകത്തേക്ക് സുസ്വാഗതം...

 
At January 7, 2008 at 3:11 AM , Blogger സുല്‍ |Sul said...

കവിത നന്നായിരിക്കുന്നു.
സുസ്വാഗതം ബൂലോഗത്തേക്ക്.
-സുല്‍

 
At January 22, 2008 at 7:08 AM , Blogger അപര്‍ണ്ണ said...

very nice, really I liked it

 
At January 24, 2008 at 8:41 PM , Blogger Seema said...

thank u aparna...

 
At February 12, 2008 at 10:04 AM , Blogger Jayasree Lakshmy Kumar said...

കവ്വിത വളരേ നന്നായിരിക്കുന്നു അനാമിക

 

Post a Comment

Subscribe to Post Comments [Atom]

<< Home